فالحين فلاحة يا جدع .اسعاد يونس - ..ٌ::ٌ:: النسابون العرب ::ٌ::ٌ..
..ٌ::ٌ:: النسابون العرب ::ٌ::ٌ..

التميز خلال 24 ساعة
العضو المميز الموضوع المميز المشرف المميز
المرازيق بالاردن
بقلم : محمد ثامر
« آخـــر الـــمــواضيـع »
         :: معرفة النسب (آخر رد :الشريف ابوعمر الدويري)       :: لماذا حذفتم هذه الأقسام ؟ (آخر رد :الشريف ابوعمر الدويري)       :: المرازيق بالاردن (آخر رد :الشريف ابوعمر الدويري)       :: اريد معرفة اي معلومة عن عائلة ابو احمد بفلسطين (آخر رد :الشريف ابوعمر الدويري)       :: كفايه البُعد ي الغالي (آخر رد :منصور أبو جعفر)       :: ( لغز ) (آخر رد :غنموس جحيدر)       :: الأشراف الهلمان الحسنيون (آخر رد :البراهيم)       :: نسب قبيلة بني فوغال في ولاية جيجل (آخر رد :علار الشعراوية)       :: عائلة الشيمى لو تكرمت عاوز اعرف نسب العائله (آخر رد :محمدابوبكر)       :: اقدم واول سلاله سكنت جزيرة العرب والشرق الاوسط هي E-m123 (آخر رد :خلف بن لافي المطرفي)      



الصالون الفكري العربي مجلس الحوار العربي و استطلاعات الرأي

Like Tree1Likes
  • 1 Post By نبيل زغيبر

إضافة رد
قديم 18-04-2014, 10:30 PM   رقم المشاركة :[1]
معلومات العضو
عضو موقوف
 
أحصائيات العضو

علم الدولة : علم الدولة Egypt

1 (7) فالحين فلاحة يا جدع .اسعاد يونس

فالحين فلاحة يا جدع
إسعاد يونس
■ زمان من كام سنة كده.. كان عندنا حاجة اسمها البث المشفر.. وكان فيه جهاز المفروض نشتريه عشان نعمل اشتراك فى القنوات المشفرة عشان تتفتحلنا ونتفرج على المحتوى اللى عليها من أفلام ومسلسلات وأغانى وبرامج.. قوم إيه بقى.. قوم صاحب المشروع يلم فلوسه اللى اتفخت قلبه فيها عشان يعمل المشروع ده..
■ لكن اللى حصل إن المصريين اللى بيشقلطوا العالم انبهار فى الصالحة والطالحة.. استخرعوا طريقة يتفرجوا بيها على المشفر ده ببلاش.. لأن سلو بلدنا البلاش كتر منه.. فعملوا سلكة تشغل الجهاز سفلقة وتمكنوا من اقتحامه وانتهاك خصوصيته وبقى بيتفتح فى أى وقت ومكان وضاعت مكانته وجدواه.. مين ضاع معاه؟.. المستثمر اللى اتفخت عشان يعمله.. طبعا اشتكى وصرخ ولسانه دلدل.. لكن كالعادة برضه وسلو بلدنا إنه لا مجيب.. ودن من طين وودن من عجين.. طنش تعيش.. بلطج تعيش أكتر.. الراجل راح جاب واحد شيخ مودرن كان مشهور قوى ساعتها وبيطلع بالجينز، عسى الشباب يقتنعوا بكلامه.. وعمل حملة بيقول فيها إن السلكة حرام لأنها سرقة.. سرقة مال وعرق وجهد وأكل عيش آلاف من البشر بأسرهم بيعيشوا من النشاط ده.. ولأنك لما بتتعدى على ما هو ليس لك يبقى كأنك البعيد بتطفح من حرام.. لكن لأننا شعب متدين بالفطرة والبسملة والحوقلة مربوطين على لساننا بفتلة.. وبنصلى الفرض بفرضه وبنعمل عمرات بتمنميت مليار جنيه فى السنة.. لكن لساننا طويل يتفاتله بلاد وقلة أدبنا فاقت الحدود، وعايشين عاللوع والاقتصاد الموازى اللى شغال أنهار وبحور من تحت كل الترابيزات ونُصر على إبهار العالم، فقد قررنا وضع بذرة البلطجة الاجتماعية مبكرا وضربنا عوافى على كل ده واستمرينا نسرق المحتوى بالسلكة.
■ وده بالتزامن مع استعباط الحكومة واستهبالها، وإهمالها للجدع المستثمر ومدام عايز الدح يلبس بقى.. مفيش مشكلة لما تتقلع عينه يعنى.. ما عنده واحدة تانية.. الناتج.. النشاط ده أفلس وقفل والموظفين اتشردوا والمؤسسة جت عالأرض.. نزل الراجل اتباعا لمنهج إذا ما قدرتش عليهم ناسبهم.. اضطر الراجل يتحالف مع الحرامية عشان ينقذ ما يمكن إنقاذه، لكن كانت المنظومة باظت وأصبح الحرام حلال والجريمة المعتادة عُرف.. سابقة تِعرّ أى شعب واستمرارها يِعرّ أكتر.. لكن يظهر العرارة طعمها حلو وبقت مكمل للشخصية المصرية.
■ تلف الأيام وتدور ويبدع الشعب المصرى مرة أخرى ويبهر العالم اللى جاله فتاق من الانبهار ويخترع ضرب الأفلام بالفيديوهات وينزل يبيعها عينى عينك فى الشوارع.. يستنجد صناع الفيديو ويلطموا والحكومة ضاربة ترامادول وعاملة دماغ حمار وماتعالجش الظاهرة رغم ما فيها من غش تجارى وتهرب ضريبى وضرب صناعة فى قلب اللى خلفوها.. فتستفحل الظاهرة مع الدى فى دى وتموص المسألة لتصل إلى أن هذه الدى فى ديهات تباع فى مراكز بيع حكومية وسيادية، ولا كأن فيه قانون ولا نيلة وكان عادى جدا إنك تلاقى ظابط على كتافه قفص طيور غير قابلة للدبح واقف ينقى دى فيديهات ويبلطج فى تمنها كمان مدام مسروقة.. وبرضه تجف الحلوق من النباح أن القوانين الخاصة بالقرصنة ليست رادعة بالمرة.. دى معمولة كده عشان المقبوض عليه يجيب كيلو كباب ورشة سوبر ويعشى القسم لحد ما يخرجوه الصبح ويرجعوله الأجهزة اللى صادروها، واحتمال يوصلوه البيت مع تقديم الاعتذار ملفوف فى بوكيه قرنفل.. تمثيلية رديئة الصنع يعنى.. وإهمال توعية رجال القضاء والنيابة بفداحة الموضوع فتصدر أحكام هزيلة ولا ليها تلاتين لازمة.. مهما وقفت شرحت لوكيل النيابة أو القاضى.. هو يا إما ليس لديه معرفة بطبيعة الصناعة وفداحة الجريمة، يا إما مش فاهم وماعندوش استعداد يفهم.. يا إما واخد موقف وجدانى ضد الصناعة دى.. فالحكم ينطس بخمسميت جنيه وخلصنا.
■ تلف وتدور الأيام السودة والعالم الخارجى يخترع الإنترنت.. عنها وبقت وسيلة سرقة الأفلام والمسلسلات والأغانى وكل ما هو ثقافة ونشرها على النت ببلاش برضه.. ما هو البلاش ده تحول إلى عقيدة مقدسة وتم تقييفه بشوية مبررات دينية وأخلاقية، إن الذهاب للسيما حرام، والفن حاجة كزرة، وبالتالى الفرجة عليه ببلاش مساهمة فى إعلاء الدين والقيم.. وكنت تدخل الموقع المقرصن تتوه من كتر الآيات القرآنية والأحاديث الشريفة.. وتلاقى اسم الفيلم المسروق مكتوب كده بالخط الكوفى.. شوف الحلاوة؟..
■ لكن الكبيرة بقى حصلت.. اكتشف شوية بلطجية حجم التسيب واللامبالاة وجهل الأنظمة وقالك مدام مفيش رادع ولا قانون ومفهومية.. ما تيجوا نروح نأجر قنوات مفروشة إيجار جديد فى أقمار صناعية مجاورة كده بس لابدة فى طريق النايل سات.. اللى يتعرض على القنوات دى حايتعرض على النايل سات.. الإيجارة بكام يا عم؟.. قالولهم أجر زهيد.. طب فيه أى شروط.. قالولهم الانتظام فى السداد.. سألوهم مش حتسألوا القنوات دى حتعرض إيه؟.. قالولهم إنتم وكيفكم.. شالله تعرضوا فيها غسيل على حبل.. شىء ما يخصناش.. المهم تدفعوا الإيجارة..
■ طب يعنى لو اتضح إن اللى مأجرين عندكم المطرح دول استعملوا المكان فى الحرام؟.. قالك ولا يهمنا.. طب يا جدع ده لما واحد يأجر شقة ويمارس فيها الدعارة بتتشمع.. قالك محدش يقدر.. قلنا طب والاتفاقيات وشرف المهنة وميثاق البتاع وكده.. ورونا عرض قفاهم.
■ نزلوا البلطجية دول أجروا شوية عيال واشترولهم شوية هارديسكات واقعد انقل يا وَلَه أى حاجة تقابلك.. فيلم بيتعرض فى السيما أو بيتذاع على قناة هات حتى ولو بلوجو القناة.. إحنا مابتفرقش معانا الحاجات الصغيرة دى.. مسلسل هات.. فيلم هندى أو أمريكانى أو من أى ملة.. زيح.. أغانى وكليبات ومسرحيات.. اللى تلاقيه ف وشك.. وإحنا نلزق الهارديسك ده على القناة وذيع.. العيال نزلت انتشرت.. لمت من كل لون.. وسعروا الهارديسك الواحد بعشرتلاف جنيه.. عليه إيه بقى؟.. اتناشر ألف ساعة محتوى من كل لون.
■ بدأت القنوات دى تذيع كل حاجة وأى حاجة بلا عقود ولا معرفة أصحاب الأعمال ولا الحكومة ولا أى نيلة.. شوية شوية الناس مدمنة السرقة.. اللى ممكن تلبس صيغة مسروقة وتاكل دواب نافقة وتشرب مية الجيران سفلقة انتبهت للقنوات دى.. وبدأت تحول المؤشر إليها وتتفرج.. اختفت فكرة الحرمانية وسرى قانون البلطجة وبقوا يتبادلوا أخبار الأفلام المسروقة عليها عادى جدا، رغم نهم شايفين الأفلام لسه بتتعرض فى السينمات..
■ ثم بدأت هذه الأوكار تجتذب بعض المعلنين أصحاب البضائع المشبوهة والرخيصة التى لا تجد مكانا لها على القنوات المحترمة.. فبدأت تجد عليها إعلانات بالنص ساعة تروج للزقة اللى بتسحب الجلخ من بطن الرجل.. والحبة التى تطيل عمر اللقاء الحميمى.. والدهان اللى بيغير من معالم الحاجات العيب.. واستعراضات مطولة للحلة أم ودنين وبتنفس البخار وبتقدح السمنة.. والبطانية اللى تفرشها كده تدفى تلمها كده تطرى.. فأصبحوا يبيعون لهم الدقيقة بنكلة.. فقعدوا وريحوا فى القنوات دى.. لكن الأخطر أن المعلنين المحترمين أصبحوا يفكرون فى اللجوء لهذه القنوات ليعلنوا عليها.. منهم الشركات المالتى ناشيونال التى بدأت تفكر وتزقزق للرخص بس خايفة تاخد الخطوة الأولى.. فإذا علمتم أن سعر النصف دقيقة على القنوات الشرعية وفى البرامج متوسطة الجماهيرية يبلغ ثلاثين ألف جنيه.. يعنى الثانية بألف جنيه.. فكم تظنون سعر النصف دقيقة على هذه الأوكار؟؟.. عشرة جنيهات!!
■ ما هى التكلفة؟ نكلة والمحتوى مسروق.. والمقر شقة بميتين جنيه فى عمارات قريبة من معهد السينما بالهرم.. لازم يبقى سعره هزيل كده.. ولكن هذا السعر الهزيل أصبح يحقق لكل صاحب وكر من دول اتنين مليون جنيه فى الشهر؟!!
■ كل هذه الدائرة الشيطانية تعيش على دم المنتجين وأعمالهم المسروقة..
■ الخوف أن تجد شركات الإعلان المالتى ناشيونال مبررا يجعلها تتجه لهذه الأوكار وتنصرف عن القنوات الشرعية، فينتهى الاقتصاد القائم على المعلن الذى أصبح الممول الوحيد للإعلام والثقافة فى مصر فى دولة غاب دورها تماما.
■ هذا الدمار أتى على آخر رمق لصناعة السينما فى المقام الأول.. حيث لم يتم بيع كادر واحد للقنوات المفتوحة منذ ثلاث سنوات وأكثر.. تشترى ليه ما هى الحاجة مرطرطة على الأوكار دى.. وسوف تليها صناعة الدراما التى مازالت تتمتع ببعض الحياة وإن بدأت تخبو أيضا.
■ وبالتالى وكما هى العادة.. ستتحول السرقة إلى عُرف والعُرف إلى قانون فى بلد ساحت فيه كل المعالم..
■ وبالتالى أيضا أصبحنا البلد الوحيد الذى يتم السطو عليه من قنوات أقمار مجاورة بقوام تلاتة وسبعين قناة أو وكر مقرصن حتى الآن ولسه بتزيد.. مازلنا بنبهر العالم لحد ما حيجيله شرخ فى الناصور..
■ ضيعنا الحاجتين اللى كنا بنعرف نعملهم فى حياتنا.. الثقافة والسياحة.. فالحين فلاحة يا جدع..
اعجبنى


نبيل زغيبر غير متواجد حالياً   رد مع اقتباس
قديم 19-04-2014, 08:17 AM   رقم المشاركة :[2]
معلومات العضو
ضيف شرف النسابون العرب
 
الصورة الرمزية الشريف محمد الجموني
 
أحصائيات العضو

علم الدولة : علم الدولة jordan

افتراضي

امتعتني المتابعة.
والحال احزنني.
توقيع : الشريف محمد الجموني

{وَلْتَكُن مِّنكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ وَأُوْلَـئِكَ هُمُ الْمُفْلِحُونَ }آل عمران104
الشريف محمد الجموني غير متواجد حالياً   رد مع اقتباس
قديم 20-04-2014, 01:57 AM   رقم المشاركة :[3]
معلومات العضو
عضو موقوف
 
أحصائيات العضو

علم الدولة : علم الدولة Egypt

افتراضي

أجــمل وأرق باقات ورودى
لردك الجميل ومرورك العطر
تــحــياتي لك
كل الود والتقدير
دمت برضى من الرحــمن
لك خالص احترامي
نبيل زغيبر غير متواجد حالياً   رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
قبيلة أولاد فـــــايد الحــــــــــــرابي بالفيوم ( عرب الفيوم) أشرف الفايدي مجلس قبائل مصر العام 13 14-11-2020 06:00 PM
الهادي في أنساب وتراث السعادي ( الماضي والحاضر) للشيخ / حمدي محمود الديداني الفايدي أشرف الفايدي مجلس قبيلة الفوايد 24 08-08-2020 01:47 AM
معجم بلدان فلسطين - محمد شراب د ايمن زغروت مجلس قبائل فلسطين 42 08-06-2019 07:18 PM
قصة يونس عليه السلام و اهل نينوى . البداية و النهاية للحافظ ابن كثير خادم القران مجلس قصص الانبياء 0 16-07-2017 11:51 AM
قصه سيدنا يونس عليه السلام عزت احمد محمد سيد البربرى الاسلام باقلامنا 0 18-03-2011 11:15 AM

  :: مواقع صديقة ::

:: :: :: :: ::

:: :: :: :: ::


الساعة الآن 08:02 AM


Powered by vBulletin® Copyright ©2000 - 2020, Jelsoft Enterprises Ltd.
SEO by vBSEO TranZ By Almuhajir
..ٌ:: جميع الحقوق محفوظة لموقع "النسابون العرب" كعلامة تجارية لمالكه المهندس أيمن زغروت الحسيني ::ٌ..
منتج الاعلانات العشوائي بدعم من الحياه الزوجيه